Exodus 16

Isaraee máqannaasa mannaa faqa ufini faqa mara naqau.

1Isaraee máqannaasa Isipa máqa maaqáindari quqásee ánuqooqari ínaaqíannaa quqoona 15 fáasaanasaa Sinái áaqana dínni Eerimma máqa máaqa dínni qámbaana Sinnaa aadána máqa máaqaki óonuraqau. 2Misa aiqámausa aadána maqa maaqai funára Mooseesa Áaroonasa kaukaata qímannimaqasee qiqau. 3Maasá Isipa máqa máaqaki máriafánnaqoo Yáaweefa dáruaqaana. Miqóo maasa máridaqa aandáù faqa akaqá nárana maasá dídi máruna maasá qimana káì néemaríqiafana. Ínneeqara miqóoqaraana maasá qífiqeeqeeqa maa aadana maqa maaqánaki quqásaafaqa aandaroo dárinaqa kuqu taikáanaura.

4Yáaweefa misá úfa iriséenoo Mooseena qímaminoo qinau. Qinée maqee ínni aiqámausa náranara qíànanoo innaarúnaindari aakuara foorá áqufina mára neefáranoo. Faasaambáasaana nárana quqásaanaqa faiqí ánaasee ráudamáfiqa moodáa faasaana amanakáì máree márifaranoo. Qinée miqímmasee misá nimanamásee qáfaanaura. Misá qiní ufa írifaree sía fee írifaree. 5Moodáannai qisauku taikásee dínni ani moodáa marasée 6 faasaana qaara eenda nárana amanasáa mara deedaqammá quqáaqa. 6Mooseesa Áaroonasa Isaraee máqannaa aiqáma suqúsee qímannimiqa qiqau. Maqee eenée márinaqa ínnee Yáaweenara Isipa máqa máaqaindari nífiqee ánunara írifaranoo. 7Kanánaana ínnee Yáaweefa maasáki máridanoo dároo dáraa ida káaqa qéemarína qáfeefaranoo. Innee minára áanoo qímariana dóo mifá írinoo. Ínnee sía maaqandá ráù qímariafanóo fáù. Maaqandá faiqí faiqì kai máridaqa miná naakápurufa máu fídaqa miná kai qímannimidaqa. 8Mooseefa kafáa qímanniminoo qinau. Eendínanoo Yáaweefa aandáù níminaqa neefáranoo. Kanánaana beréeta fooqáana ínni nimana kái nímiannoo. Ínnee miná firaaqóo áanoo qímarianara miqíannoo. Ínnee maasára áanoo qímariana sía maasárau miqí máriafanoo, Yáaweenara áanoo qímaríafanoo.

9Mooseefa Áaroona qímaminoo qinau. Anée Isaraee máqannaa aiqáma qíma níminaqa Yáaweena óorinni ani kikíqiaqa. Mifá misá aanooqira ufa írinara miqíaqa.

10Áaroofa faiqí ánaasee ufa qímannimi márufaqa quandáfi aadána máqa máaqai qáfoofanoo oonámuki Yáaweena dároo dáraa íra káaqa qárafa koorooínau.

11Yáaweefa Mooseena qímaminoo qinau. 12Qinée Isaraee máqannaa áanoo qíra ufa dóo íriqa. Maaqí qímasee qímannimia fáfaa eendínoo mammandí márinaqa misa aandáù nímianaura dúna kanánaana uqanna beréeta fooqáana nári nárana nimana kái nímianaura. Nimisáanaqa ínnee qiní Yáaweesa ínneeqa Ánutusara írifaranoo.

13Miqí qímasoofanoo eendí márufanoo áfídauqa moómoo qaqamáraidaqa anirámeeqee úiqaana máqusa amanaíkiqau. Kanánaana qifífaramu úiqaana máqa aiqáma fíqu fíqu inóo márinau. 14Qifífaramu taikáfufanoo adamanná áinaina káqikaafauqa aadána máqa mau márinau. Mi ainaináfa pupúsámuara foorá káqikaafáuqa márinau. 15Isaraee máqannaasa miná qáfamaseeqa miná óosanara randéeqa narí qímami narí qímamiqa qiqau. Maana nána ainaina fée máridanoo fee qiqau. Miqí qufanóo Mooseefa maaqí qímasee qímanniminau. Yáaweefa nárana naaqéera nímidannoo. 16Yáaweefa maaqí qímasee qímanniminau. Ínnee ínneeqa faiqì ánaasee faqa ínneeqa nimana kái máraaqa. Ínneeqa máaqaki máriasa nimana nimana kái susufínna qumbiqá quqáaqa. 17Isaraee máqannaa irisée miqímmiqau. Akaqáusa moómoo mároofaqa akaqáusa qóodaa máraqau.

18Aiqámausa suqúsee narí amaní narí amaní másee qáfoofanoo akaqáusa moómoo suqúfanoo akaqáusa óodaa suqíqau. Moómoo suqúsa námasoofanóo nímuaqumminau. Óodaa suqúsa misá faqa námásoofanoo nímuaqu kaimminau. Aiqámausa nárì nimana káì suqíqau. 19Mooseefa qímanniminoo qinau. Sía átaraasa dúna náraree qímasee quqáaqa. Aiqáma naaqa.

20Miqí qufaqá akaqáusa Mooseena ufa rukíasee dúna kanánaana náraree qímasee quqásoofanoo putaá úndufanoo qimí kai qumbiqóofanoo Mooseefa áranaqoofanoo áanoomannímaqanau.

21Aiqáma kanánaana nári nimana kái suqúsaida néemariqau. Kaqi máfìsoofáuqa súani ururéenoo idídiufanoo nammári nammárimma taikánau. 22Dínni ani moodáa marasée 6 fáasaanasaa qaara kari suqárana amana kái máraqau. Miqí másoofaqa Isaraee máqannaasa úriqararausa anirée mi ainainnára Mooseena qímamiqau. 23Mooseefa iriseenoo moó ufa maaqí qímasee qímanniminau. Dúna Yáaweena náaquqara idooara fáasaana máriannoo. Mi faasaanná mináindi máriannoo. Ínnee nána áinainee suqáraree qínnana maqée suqáaqa. Káqi márinna nárana áaduma quqáqaifanoo márinaqa dúna suqá naaqa.

24Misá Mooseefa qímannimúndee íqa dúnaindi káqi máaqaki quqáqau. Iqáqoofaqa qáfoofanoo sía putaa ínoo qimí márinau ámiqinoo márinau. 25Mooseefa minára qímanniminoo qinau. Dóo maqee miná naaqa. Maqee Sabáta idooára fáasaana Yáaweenaindi máridanoo. Minára ínnee fúka nárana úiqaana máqusa naambeeáqara márarafa sía máriannoo. 26Ínnee qísauku dínni taikásee dínni ani moodáa marasée 6 fáasaana nárana suqú quqáaqa. Qísauku dínni taikásee dínni ani qaara marasée 7 fáasaana idooára faasaana márinaqa sía miqóo nárana máriannoo.

27Qísauku dínni taikásee dínni ani qaara marasée 7 faasaanasaa akaqáusa nárana suqúanee qímasee óonu qáfoofanoo sía márinau. 28Ánutufa miná qáfamasee Mooseena qímaminau. Ínnee kísaaqasaa fée qiní ufa rukíaidaqa sía qiní sánda ufa áfaqéefaréè. 29Ínnee íriaqa. Qinee Yáaweesa idooára fáasaana nímiqa. Miqúnnanara qinee dínni taikásee dínni ani moodáa marasée 6 fáasaanasaa qinee qaara faasaana nárana amana kái nímianaura. Aiqámausa mi faasaanná ínneeqa máriaqoo kai máriaqa, sía kásiaqa. 30Faiqí ánaasee minára iriséeqa dínni ani qaara marasée 7 fáasaanáikufaqa sía aináini máriqau. 31Isaraee máqannaasa mi narannára mannaa fée qímariqau. Mifa ooroorána qaqama fooqáafa éekara árirafa márinau. Miná námasoofanoo miná adíafaa írafa ookasaasá ánoonannái áuqira biskítara foorá ímarinau. 32Mooseefa Yáaweena úfa iriséenoo maaqí qímasee qímanniminau. Yáaweefa ínniara maaqí qídanoo, qinée mannaa nímmunnana akaqána afeekí mara quqáqai márinaqa ínneeqa nínaiqimara nikeekú nikaakú uqannífiqaidaqa maaqí qímasee qímannimiaqa. Yáaweefa Isipa máqasaaqari maasá aadána máqasaa nífiqee aniréenoo qímufaqa náafannanee qímasee uqannífiqaaqa.

33Miqí qímasee qímannimiseenoo Mooseefa Áaroona qímaminau. Anée qafee moó mara máree mannaa súqeeqee Ánutuna áfusaa quqásainaqa kásooaqee kambíqáinausa qáfaaqa.

34Yáaweefa Mooseena qímamúndee ínoo Áaroonafa mi naranná mara máreenoo moodáanaki kíra bóokisa aaqá quqásoofanoo márinau. 35Isaraee máqannaasa 40 áukuanaki mannaa néemariqau. Mi naranná naqá fífiufaqa Kannaana máqasaa náriqa máriraree quqóo óonuraqau. 36Mi karí misa ummaara amana másee qáfee márufa qaaraqánda márinau. Moó fannoo moodáa káqikaa susufínna amana márinau. Moo fannoo qísaukuqara 10 káqikáa súsufinauqa amana márinau.